Jon Inarritu EH Bilduko ordezkariak iazko abenduan galdetu zion Kongresuko Mahaiari noiz eraiki behar duen Espainiako Gobernuak A-2522 errepidean aurreikusitako errotonda. Aretako AP-68 irteeran egongo da azpiegitura hori eta, printzipioz, Basaurbeko araztegiko lanak baliatu behar ziren bere eraikuntzarako.
Espainiako Gobernuak errotonda eraikitzeko obrak hasi direla esan arren, lanak ez dituzte abiatu
Zentzu horretan, Inarrituk adierazi zion Gobernuari premiazko dela lanak ahalik eta lasterren egikaritzea, trafiko istripuak egoteko arrisku handia dagoelako, bertan batzen direlako araztegiko obrek sortzen duten kamioi trafikoa, AP-68 autobideak eragiten duena eta Orozko edota Laudioko herritarren mugimenduek sortutakoak.
Gobernuaren erantzuna, errealitatearekin harremanik ez
Espainiako Gobernuak otsailean erantzun dio Inarrituri eta bere erantzunak ez dauka islarik errealitatean. Berez, Pedro Sanchez presidente duen Gobernuak adierazi dio EH Bilduko kongresukideari 2023ko ekainetik aurrera egongo dela amaituta biribilgunea, eta lanak jadanik hasi direla.
Ordea, tokia bisitatu baino ez dago ziurtatzeko inguru horietan ez dela obrarik abiatu. Goiko argazkian ikusi daiteke hori, gaur goizean egina baitago.