Kalean dago honezkero Aiaraldea Hemen hamabostekari berria, 176. zenbakiduna, alegia. Emakume Langileen Nazioarteko Eguna ate-joka dagoela probestuz, Aiaraldeko Mugimendu Feministarekin elkartu gara, aurtengo hitzordurako prestatu dituzten dinamika eta mobilizazioen inguruan hausnartzeko. Hartara, asteazkeneko mobilizazioen agenda ere jaso dugu, herriz herri.
20.000 especies de abejas
Esti Urresolaren filmak historia egin zuen Berlineko zinema jaialdian. Sofia Otero Aktore Onenaren Zilarrezko hartza irabazi zuen, eta sari hori inoiz jaso duen aktorerik gazteena bilakatu da. Gaiaren inguruko erreportaje zabala landu dugu hamaboskarian, protagonisten adierazpenekin. Gainera, gure zinemetan apirilean estreinatuko den filmaren kritika ere osatu dugu, Jone Gartzia Gerra kazetariak filma ikusteko parada izan baitzuen aurrestreinaldian.
Gai gehiago
Beste hamaika gai landu ditugu hamabostekariko orrietan. Alde batetik, Joseba Urruela elkarrizketatu dugu. Urduñarra Ukrainan egon da EITBko lantaldearekin Errusiar Inbasioaren urteurrenaren testuinguruan. Bertatik ateratako ondorioak elkarbanatu ditu gurekin.
Bestalde, Aiaraldeko rokodromo eta boulderren iragana, oraina eta etorkizuna izan ditugu hizpide. Laudioko rokodromo berriak ateak irekiko ditu aurki, baina zaletasuna aspalditik dago errotuta eskualdean, eta horren inguruko erreportaje zabala osatu dugu.
Hauek eta beste hainbeste gai interesgarri topatuko ditu irakurleak Aiaraldea Hemen hamabostekariko orrietan. Datozen egunetan banatuko dugu hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.