Aiarako Biraren XXXIII. edizioa ate-joka dago. Kadete mailako lasterketa entzutetsuak larunbat honetan izango du lehenengo jardunaldia Arespalditzan. Aurretik, kirol-probaren nondik norakoak gertuagotik ezagutzeko aukera egongo da ostiral arratsaldean Aiarako Udalbatza Aretoan egingo duten aurkezpen saioan.
Ospe handiko kirol-proba
Edizioz edizio kadete-mailako prestigio handiko lasterketa bilakatu da Aiarako Bira. Horren adierazle dira Espainiako Estatutik etorritako dozenaka taldeak. Aurten 32 txirrindularitza klubek hartuko dute parte lasterketan, 196 txirrindulari guztira. Horien artean dago, adibidez, Kanariar Uharteetatik etorriko den Gran Canaria Bike Team taldea.
Berrikuntzaz beterik
Antolatzaileek prest dituzte honezkero Aiarako Biraren XXXIII. edizioa osatuko duten sei jardunaldiak. Horien artean, martxoaren 18an Laudion jokatuko den erlojupekoa izango da berritasun nagusietako bat. Lasterketaren historian lehenengo aldiz banakako erlojupeko proba egingo dute.
Txirrindulariek %11ko desnibela duten igoerei egin beharko diete aurre, 2,3 kilometroko ibilbidean. "Etapa honek txapela irabazteko hautagaiak hautatuko ditu" adierazi dute antolatzaileek.
Etapak prest
Gainerakoan, ohiko osagaiak izango dira Biraren protagonista nagusiak. Arespalditzako etapaz gain, Amurrioko lasterketa ere jokatuko da asteburu honetan, igandean hain zuzen ere. Sprint-ean erabakiko den jardunaldia izango da, aurreratu dutenez.
Martxoaren 19ko Okondoko etapak, aldiz, exijentzia maila zertxobait igoko du, 1.186 metroko desnibela batuko duten sei igoera garrantzitsurekin. Azken-aurreko jardunaldiak Artziniegako kaleetako harrizko zoladuran jarriko du lehiaren epizentroa, martxoaren 25ean.
Azken jardunaldia Maroñoko urtegian amaituko da, "paraje paregabe batean". Martxoaren 26ko jardunaldia "etapa nagusitzat" jo dute antolatzaileek.
"Liderrari erasotzeko ibilbide bat badago, hau da" adierazi dute antolakuntzatik. Txirrindulariek Askargan, Las Chozas eta Beotegiko gainetatik igaroko den 57 kilometroko luzera eta 1.186 metroko desnibel positiboa duen ibilbideari egin beharko diote aurre txapela nork eramango duen ebatzi aurretik.