Arratsaldeko manifestazio jendetsuen aurretik, eskualdeko kale eta errepideak aldarri feministekin bete dira Martxoaren 8aren testuinguruan.
Aiaraldeko Mugimendu Feministak Madres Mercedarias egoitzako langileekin batera antolatutako auto karabana izan da goizeko ekintza nagusia. 12:00etan dozenaka ekintzaile feminista abiatu dira Urduñako autokarabanen aparkalekutik, eta eskualdeko herrigune nagusiak zeharkatu dituzte, "zaintza sistema publiko komunitarioa" aldarri.
Laudion erakundeek eta Mugimendu Feministak ekitaldi bereizituak egin dituzte. 12:00etan Laudioko udalbatzan ordezkaritza duten alderdi guztien artean irakurri dute Martxoak 8ko adierazpen instituzionala. 13:00etan, aldiz, Laudio Institutuko ikasle talde bat errepidera atera da Mugimendu Feministaren auto karabanari ongi etorria egiteko.
Aipatzekoa da institutuko arte ikasleek eta bertako talde feministako kideek murala margotu dutela ikastetxean.
Aiaran herriko emakumeei buruzko liburuaren eta dokumentalaren aurkezpena egin dute nagusien egoitzan. Artziniegan, aldiz, elkarretaratzea egin dute Toñin Luengas frontoian, arratsaldeko jarduerei heldu aurretik.
Aiaraldea Komunikabidea egunaren zuzeneko jarraipena ari da egiten Twitter bidez.
Argazkiak: Aitor Aspuru Saez, Aitor Burgoa Martinez, Aimar Gutierrez Bidarte eta Izar Mendiguren Cosgaya