Kultur sorkuntza Aiaraldean

Goiatz Duttok parte hartu du aurtengo Gazte Topagunearen abestiaren sorkuntza eta grabaketan

Aitor Aspuru Saez 2023ko mar. 13a, 07:00

Süne (Josune Arakistain Huntza taldeko abeslariaren proiektua) eta Moonshine Wagon izan dira Orainari abestia egiteaz arduratu direnak. Goiatz Duttok azaldu dio Aiaraldea Komunikabideari prozesuaren zati oso garrantzitsua garatu zela eskualdean.

Larunbatean Elorrion aurkeztu ostean, atzo zabaldu zuen Ernaik Orainari abestia, hau da, aurtengo Gazte Topaguneko kanta.

Egileak Süne eta Moonshine Wagon dira. Josune Arakistain Huntza taldeko abeslariaren bakarkako proiektua da Süne. Berak eginkizuna jaso ostean, Moonshine Wagonekin jarri zen harremanetan, Goiatz Dutto talde horretako kideak Aiaraldea Komunikabideari azaldu dionez.

Elkarlana otsailean hasi zen eta, Duttok aipatutakoaren arabera, Arakistainek ideia bidali zien eta gero Luiaondon landu zuten, hau da, Goiatzen etxean bertan.

Emaitza entzungai dago, eta Arakistainen ahotsarekin batera entzun daiteke Duttoren bibolina. Laudioko musikariak gaineratu du lehen aldia dela Moonshine Wagonek bere musika soinu elektronikoekin nahastu dituela.

Esperientzia "polita eta bitxia" izan dela gaineratu du Duttok. Halaber, jakinarazi du bideoklipa aurkezpenaren aurreko astean grabatu zutela.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide