Larunbatean hasi zen aurtengo Aiarako Bira Arespalditzan. Arratsaldean egindako etapa Iñaki Isasiren omenaldiarekin abiatu zuten, berak moztu baitzuen zinta. Halaber, Estela Dominguez eta Jose Antonio Mur gogoratu zituzten, minutuko isilunearekin.
Behin lasterketa hasita, erorketa txikiak gertatu ziren eta berdintasunak azken birara arte iraun zuen. Azken txanpa horretan zortzi txirrindularik egin zuten ihesaldia eta Adrian Prieto irabazlearen ostean Iker Colemenero Aiaraldeko kirolariak zeharkatu zuen helmuga. Horri esker bigarren kokatu zen sailkapen orokorrean eta mendiko zein Arabako maillotak jantzi zituen.
Atzoko hitzordua Amurrion izan zen eta hasiera mugitua izan zen berriro, erorketak egon baitziren. Ondorioak ez ziren larriak izan, baina artatu behar izan zituzten txirrindulariak.
Etaparen erdian, Iker Colmenerok eta beste txirrindulari batzuek ihesaldia abiatu zuten, baina fruiturik gabe. Azken biran, ordea, Daniel Ladok eta Hector Fernandezek tropela atzean utzi eta 20 segundoko abantaila sortzea lortu zuten. Ladorena izan zen garaipena.
Iker Colmenero izan zen berriro hoberen sailkatu zen aiaraldearra. Zazpigarren heldu zen eta bosgarren kokatu da sailkapen orokorrean. Ion Eguiak ere emaitza onak eskuratu ditu eta hamabosgarrena da sailkapen orokorrean. Aiara Txirrindularitza Elkarteko taldea (Luyando Opticos Ganzedo) bigarrena da momentuz sailkapenean.
Edonola ere, beste lau etapa falta dira proba amaitzeko.