Loraldia Festibalak aurrera jarraitzen du euskara eta arte adierazpen berritzaileak nahasten. Asteburu honetan horretako hiru proposamen eramango ditu Bilbora eta Aiaraldea Komunikabideak sarrera bikoitzak lortzeko aukera emango du.
Hasteko, ostiralean 20:00etan Tetuan film dokumentala proiektatuko dute EHUko Bizkaia Aretoan, Iratxe Fresneda egilearekin. Irrintziaren Oihartzunak eta Lurralde Hotzak filmekin hasitako erregistro eta oroimenaren inguruko filmen trilogia osatu du.
Migratzaileei buruzko filma da hau, non zinema, familia istorioak eta memoria batzen dituen. Annemarie, Carmelo, Irina eta Mohamed dira protagonistak. Istorioak elkarlotzen dira eta irudi ederren bidez euren bizitzekin enpatia sortu nahi du dokumental esperimental honek.
5 orduko ikuskizuna larunbatean
Larunbatean Loraldia Terminala. Sormen berriaren harrobia ikuskizunaren txanda helduko da. Hain zuzen, Deustuko irlako La Terminal aretoan lau ikuskizun plazaratuko dituzte. Arratsalde osoan antzerkia, musika tradizionala zein garaikidea, eta bertsolaritza uztartuko dituzte.
Proposamen berritzaile horiek kultur-industria honen lau espaziotan taularatuko dituzte.
Poperra, afterra, utopia
Igandean Guggenheim Museoan musika, bertsolaritza eta literatura uztartuko duen emanaldia hasiko da 12:30ean. Danele Sarriugartek idatzitako izen bereko testua da oinarria eta bi bertsolari, Maddi Ane Txoperena eta Maider Arregi, eta musikari bat, Miren Narbaiza, arituko dira oholtzan.