Kalean dago honezkero Aiaraldea Hemen hamabostekariaren zenbaki berria. Eduki interesgarri ugari jorratzen ditu, eskualdeko aktualitateari lotuak. Esti Urresola zinema zuzendariari eskaini diogu hamabostekariko azala. Ibilbide luze bezain oparo baten ostean, Euskal Herriko zinema aretoetara iritsiko da Urresolaren 20.000 especies de abejas filma, eta zuzendari laudioarrak tartea atera du Aiaraldea Komunikabidearekin pelikula berriaren inguruan solasteko.
Horrez gain, beste hainbat eduki interesgarri bildu ditugu agerkarian. Besteak beste, Lamuza eta Zabalekoko ikastetxeetako guraso elkarteekin bildu gara. Izan ere, Eusko Jaurlaritzako Hezkuntza Sailak aurrematrikulazio kanpainan abian jarritako 'zaurgarritasun indizeak' gatazkak piztu ditu eskualdeko zenbait eskoletan.
Burubio Elkarteko kideekin ere egon gara, ostiralean ospatuko duten 7. urteurrenaren harira. Eta, azkenik, Laztana Laztana proiektu musikala bertatik bertara ezagutzeko aukera ere izan dugu.
Aiaraldea Jaietan
Ohiko hamabostekariarekin batera, Aiataldea Jaietan gehigarri berezia aurkituko du irakurleak agerkariko orrien artean. Bertan bildu dugu Aiarako, San Joseko eta Otxomaioetako jai-programazio guztia. Gainera, ospakizunetako zenbait protagonistekin hitz egiteko tartea ere izan dugu.
Hauek eta beste hainbeste gai aurkituko ditu irakurleak Aiaraldea Hemen hamabostekariko orrietan. Datozen egunetan banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.