Mobilizazio goiza izan zen larunbatekoa Aiaraldeko Mendiak Bizirik plataformarentzat. Dozenaka lagun bildu ziren Orozkotik Laudiora joan zen bizikleta martxan, eta mobilizazioa egin zuten jarraian, Aiarako batukada feministaren erritmopean.
Ekimenaren xedea izan zen “espazio libreak eta berdeak mehatxatzen dituzten eskualdeko proiektu makro-eolikoak” salatzea, manifestazioaren osteko irakurketan azaldu zutenez. “Mahai gainean dauden proiektu horiek eremu komunalak eta laborantza-lurrak bereganatzen dituzte, gure lurraldea egituratzen duten eta bizitzari eusten dioten ekosistemen desagertzea ekarriz”.
Plataformako kideek argi adierazi zuten ez dutela onartuko “kontsumoa nabarmen murriztea eta produkzio sistema beregituratzea aurreikusten ez duen politikarik”, eta aldarrikatu zuten “produkzio sistema ondasun komunala hobetzera” bideratu behar dela.
Ildo horretan, alternatibak daudela ziurtatu zuten, “baina industria pribatuak ez ditu aukera energetiko berdeak sortu nahi, kontsumoa eta haien negozioa handitu baizik”. Horregatik uste dute eskualdean egin nahi dituzten parke eolikoek gehiago dutela negoziotik trantzisio energetikotik baino.
Hurrengo deialdiak
Hurrengo deialdien berri ere eman zuten. Maiatzaren 2an egingo dute hurrengo bilera irekia, Orozkoko kultur etxean 18:30ean. “Gainera, maiatzaren 20an Gasteizen nazio mailako mobilizazioa ospatuko da. Eta ekainaren 10ean Jesuriko mendi martxara gonbidatu nahi zaituztegu”.
Argazkiak: Aiaraldea.eus eta Ander Fernandez