Aiaraldea Komunikabideak gaur eguerdian ekingo dio eskualdeko alkategaiei egindako bideo elkarrizketak eskaintzeari.
Hedabideak ahalegina egin du jatorri aiaraldearra duten guztiei aukera hori eskaintzeko, modu batean edo bestean. Guztira, 20 bideo baino gehiago izango dira eta ordezkaritza politikoa duten alderdi guztiak agertuko dira: EAJ, EH Bildu, PSE-EE, PP, alderdi independenteak (Omnia, Aiara Batuz, Okondo Aurrera eta Orain Amurrio) eta Elkarrekin Podemos.
Hala ere, haiek erabakita, absentzia nabarmenak ere egongo dira: Txerra Molinuevo EAJko alkategaia Amurrion, Iker Santocildes zerrendaburu jeltzale urduñarra, Joseba Ruiz Alonso 'Piru' EH Bilduko zerrendaburu okondoarra eta Arakaldoko alkategaiak.
Gauzak horrela, hurrengo datetan plazaratuko dira bideoak:
- Maiatzak 11, osteguna: Laudio
- Maiatzak 12, ostirala: Urduña
- Maiatzak 13, larunbata: Arrankudiaga-Zollo
- Maiatzak 15, astelehena: Amurrio
- Maiatzak 17, asteazkena: Orozko
- Maiatzak 18, osteguna: Aiara
- Maiatzak 19, ostirala: Artziniega
- Maiatzak 21, igandea: Okondo
Jarraipen berezia
Edonola ere, Aiaraldea Komunikabideak prestatutako jarraipen bereziaren zati bat baino ez dira izango bideo elkarrizketa horiek.Hedabideak atal berezian jasoko da informazio guztia eta hauteskunde kanpainako ekitaldi nagusien berri emango du bertan.
Horrez gain, herri gehienetan uko egin badiote ere, alkategaien mahai inguruak ere egingo ditu hedabideak eta maiatzaren 28an zuzeneko telebista saioa emitituko du, hurrengo egunean emaitza guztiak Aiaraldea Hemen aldizkarian argitaratzeko.