EAJk sendotu du, nolabait, bere hegemonia politikoa eskualdean, bere esku zeuden alkatetzak ez ezik, Urduñakoa eta Orozkokoa ere izango baititu. Hala ere, bi puntu beltz utzi ditu bere garaipenak.
Alde batetik, mila bozka baino gehiago galdu ditu bidean eta horrek isla izan du, adibidez, Aiarako gehiengo osoaren galeran -Aiara Batuzen alde-. Bestetik, bere kudeaketaren ikur izan den Laudioko zerrenda ez da aukera bozkatuena izan alde txikiagatik, EH Bilduren mesederako, eta hori ezustekoa izan da. Are gehiago, aintzat hartuta EITB Focusen inkestak irabazletzat iragarri ostean.
Edonola ere, Aiaraldeko herri populatuenean alkategai bozkatuena ez izatea -akordioen bidez oraindik alkatetza eskuratu dezake oraindik Ander Añibarrok eta hor dago Omniaren garrantzia-, ez du esan nahi mugarririk jarri ez zuenik atzo. Esaterako, Okondon gehiengo absolutua eskuratu du EAJk. Halaber, duela lau urteko bozka kopuru berarekin, Iker Santocildes jeltzalea izango da Urduñako alkate berria. Orozkon ere gehiengo absolutua bereganatu du EAJk, ADIEren tokia guztiz hartuta. Amurrion Txerra Molinuevok eutsi dio aginte makilari eta ez du arazorik izango gobernatzeko PSE-EEren babesarekin.
EH Bilduk gora, baina Urduña galduta
EH Bilduk ezuste atsegina izan zuen Laudion eta 29 botoko aldearekin izan da zerrenda bozkatuena. Arrankudiaga-Zollon eta Artziniegan, gainera, alkatetzak mantenduko ditu eta oposizioarekin handitu du aldea.
Dena den, dena ez da izan positiboa koalizioarentzat. Urduñako alkatetza galdu du hamabi urtez gobernatu eta gero eta Aiaran zein Okondon hirugarren indar gisa egongo da udalbatzan. Okondon ez da egoera guztiz berria, baina zinegotzi bat gutxiagorekin egingo dute.
Bi indar hauek sendotzearekin batera, PP erabat desagertu da mapa politikotik eta ez du zinegotzi bakar bat ere izango, Artziniegakoa galduta. Alderdi independenteen egoera ere aldakorra izan da; Arakaldo Taldeak alkatetza izango du, baina beste batzuek ez dute zinegotzirik izango edo boto gutxiago jaso dituzte. Horien artean Aiara Batuz izan da indartuen atera dena, eta Omniak, nahiz eta ehunka boto gutxiago izan, giltza izan daiteke Laudioko udal gobernu taldea osatzeko.
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide
