Gasteizko Caritasek jakinarazi du zeintzuk izan ziren bere esku-hartzeen datuak Araban iaz. Izan ere, 2022an 15.459 lagunek jaso zuten Caritasen laguntza, aurreko ekitaldian baino 644 familia gehiagok, gutxi gorabehera, 1.900 pertsona gehiagok.
Horietatik 385 familia Aiaraldekoak ziren. Caritasen arabera, Araban herritargoaren %10,4 bizi da bazterketan, hau da, pobrezia erlatiboan eta %9,6, aldiz, pobrezia larrian.
Elizara lotutako taldeak honakoa adierazi du: "ikusten dugu gero eta jende gehiago dagoela bazterketa-egoera larrian. Gizarte-haustura ari da gauzatzen klase ertainekiko eta gizarte aberatsarekiko".
Caritasen laguntza jaso dutenen artean, %66 emakumezkoak dira eta %76 atzerritarrak. Ildo horretatik, Atzerritartasun Legea zentzugabekeria dela salatu dute eta aldaketak beharrezkoak direla aldarrikatu: "Beharrezkoa da Atzerritartasun Legea aldatzea, gure herrialdera iristen diren pertsonek hiru urte itxaron beharrik izan ez dezaten lan egin ahal izateko. Gizatasunik gabea da, eta erabateko segurtasunik eza eragiten die pertsona horiei beren bizitzari eta aukerei dagokienez".
Etxebizitza
Etxebizitzarena ere kokatu dute aurre egin beharreko arazoen artean: "Etxebizitza eskuratzeko zailtasunek eta etxebizitza mantentzeko gastuek oinarrizko premietan egin beharreko gastua nabarmen murriztera behartzen dituzte familiak".
Horrez gain, Caritasek nabarmendu du iaz bere aldetik laguntza jaso zuten pertsona edo familien %46,3k etxebizitza partekatzen duela (%43k, 2021ean). Datu horrek agerian uzten du nolako zailtasunak dituzten familiek oinarrizko eskubide hori eskuratzeko. 2022ko urteko memoriako datu aipagarria da diru-laguntzen %50 inguru etxebizitzarekin zerikusia duten arazoei aurre egiteko erabiltzen dela.