Lehiaketa bat jarri du martxan Bizkaimendik, Bizkaiko Landa Garapenerako Elkarteen Federazioak, lurraldean ekintzailetza-proiektuak eta kultura ekintzailea sustatzeko eta landa-ingurunean enplegua sortzeko.
Bi baldintza nagusi daude lehiaketan parte hartzeko. Batetik, aurkeztutako proiektuek Bizkaiko landa-ingurunean kokatuta egon behar dute, zehazki, Eusko Jaurlaritzaren 2023-2027 urteetako 10.000 biztanletik beherako udalerrien zonifikazioaren arabera. Aiaraldean, Arakaldok, Arrankudiaga-Zollok eta Orozkok betetzen dituzte baldintza horiek.
Bestetik, proiektuak deialdiaren oinarrietan ezarritako honako tipologia hauetako batean kokatuta egon beharko dira: “Enplegua sortzen duten proiektuak, ekoizpen-berrikuntzakoak edo elikadura-kateari balioa ematera bideratutakoak, merkataritza-negozioak irekitzean oinarritutako proiektuak edo landa-eremuetan jarduera ekonomikoa edo zerbitzukoa sortzen dutenak”.
Bizkaimendik jakinarazitakoaren arabera, ekimenek ez dute zertan sektore jakin batekoak izan behar: “Gainerako baldintzak betez, nekazaritzako elikaduran, abeltzaintzan, nekazaritzan, energian, basogintzan, biztanleentzako zerbitzuetan edo artisautzan, besteak beste, oinarritzen den edozein ekimenek laguntza jaso dezake”.
Horrez gain, federakuntzak zehaztu du pertsona fisikoek zein juridikoek izango dutela proiektuak aurkezteko aukera. Epea uztailaren 28an amaituko da, 14:00etan. Interesdunek, eskualde bakoitzaren landa garapenerako elkartearen posta-elektronikora bidali beharko dituzte deialdian eskatutako dokumentu guztiak. Gorbeialdeako (Arratia) eskualdearen posta helbidea honakoa da: gorbeialde@gorbeialdea.com.
Sariak
Deialdira aurkezten diren proiektu guztiak “ebaluazio batzorde kualifikatu” batek aztertuko ditu eta honek irailaren 30a baino lehen ebatziko ditu eskabideak. Batzorde horrek lau proiektu aukeratuko ditu 1.000 euroko laguntza bana jasotzeko.
Gainera, Caixa Banken laguntza-programa batean sartuko dira ekimenak. Sei hilabetez jasoko dute laguntza, besteak beste, euren negozio-planak eta horien hedapena berrikusteko, sektoreko enpresa erreferente batekin lan-saio bat egiteko, edo zabalkunderako eta marketin digitaleko plan bat sortzeko.