Espainiako hauteskunde orokorretarako kanpaina betean murgildurik, Laudion egin dute geldialdia Sumar koalizioko Arabako hautagaiek. Gardeako industriagunean izan dira Guillermo Presa Espainiako Kongresurako zerrendaburua eta Leticia Jimenez senaturako hautagaia.
Aiaraldeak bizi duen egoera sozio-ekonomikoa salatu dute bi hautagaiek, eta administrazio publikoen esku-hartze handiagoa eskatu dute, baita berrindustrializazio-plan bat, gazte-enplegurako plan bat eta sektoreentzako laguntzak ere.
"Erakundeek modu aktiboan parte hartu behar dute lan-gatazketarako konponbideak bilatzen, Aiaraldekoak bezalako joerak geldiarazteko"
Guillermo Presa kongresurako zerrendaburuaren iritziz, "erakundeek modu aktiboan parte hartu behar dute lan-gatazketarako konponbideak bilatzen, Aiaraldekoak bezalako joerak geldiarazteko". Langileen ordezkarien eta enpresarien artean elkarrizketa mahaiak antolatzea "funtsezkoa" dela ere aldarrikatu du.
Hain zuzen ere, industrian eta lehen sektorean egin dute azpimarra Yolanda Diazen koalizio kideek eskualdearentzako proposamenak aurkezterakoan: "Benetako berrindustrializazio plan bat, gazte-enplegurako plan bat, larrialdiko laguntzak sektore kaltetuenentzat; esaterako ostalaritza, merkataritza eta kultura, eta gure denda eta baserritarren 0 kilometroko produktuen aldeko apustu irmoa".
Leticia Jimenezek nabarmendu du Aiaraldea "Euskadiko eskualde kaltetuenetako bat" dela, eta kezkaz erreparatu dio biztanleria galera nabarmenari: "Autoglass-Glavista, Tubacex, Abasolo tailerrak, Orozkoko Ama Mercedariasen egoitza, Laudioko hiltegia ixtea edo orain Tubo Reunidosentzat programatutako ERTE berria dira bizi ditugun desegite eta prekarizazio industrialeko kasuetako batzuk".
Aiaraldea suspertzeko berehalako jarduera plana ere kritikatu dute Sumarreko hautagaiek. Eusko Jaurlaritzak eta Arabako Foru Aldundiak 2022an onartutako plana "partxe" bat baino ez dela adierazi dute, eta azaldu dute "diru hori ez dela iritsi herritarrengana".