Irailaren 1etik 10era bitartean ospatuko dute Arabako Antzinako 41. Musika Astea. Hainbat kontzertu, zinema emanaldi eta hitzaldi eskainiko dituzte ostiraletik igandera bitartean Arabako kuadrilla guztietan eta Trebiñuko enklabean, eta Txiki-astea haurrentzako programazio berezia ere eskainiko dute hiru egunetan.
Aiaraldeari dagokionez, Artziniega eta Aiara bisitatuko ditu ekitaldiak. Irailaren 3an, igandean, kontzertua eskainiko du KEA Ahots Taldeak Artziniegako Arteko Gure Amaren santutegian. Saioa 18:30ean izango da eta berezia izango da, Juan de Anchietaren omenez abestuko baitute, bere heriotzaren 500. urteurrena gogoratzeko.
KEA Ahots Taldeko kideek “antzinako musikaren euskal konpositore garrantzitsuena” den Juan de Anchietaren eta beste autore garaikide batzuen obrak interpretatuko dituzte Enrique Azurzak zuzenduta eta Oscar Rodriguez Pastora organo-jotzaileak lagunduta. Johannes de Anchieta, in memoriam izena jarri diote saioari.
Aiarara irailaren 6an, asteazkenean, helduko da musika jaialdia. Kexaako monumentu multzoan 19:30ean eskainiko dute Farinelliren biolina izeneko kontzertua Tercia Realidad eta Jorge Jimenezen eskutik. Broschi, Hasse, Porpora, Scarlatti eta beste zenbait konpositoreren musika joko dute. Gainera, bisita gidatuaz gozatzeko aukera egongo da kontzertua baino ordubete lehenago.
Aiaraldeko bi kontzertuak dohainik izango dira baina gonbidapena eskuratu behar da www.entradium.com helbidean. Programazio guztia hemen kontsultatu daiteke.