Aiala Txirrindulari Elkarteko entrenatzaileek eta arduradunek hitz onak baino ez dituzte bere gazteentzat, indarrean dagoen denboraldian hainbat lorpenen protagonista izaten ari baitira.
Azkena atzo Tafallan izan zen. Ekhi Uriartek hirugarren postua erdietsi zuen sailkapenean eta horretarako gogor lan egin behar izan zuen. Izan ere, lasterketaren zati garrantzitsu batean berak bakarrik egin zuen aurrera, tropelak bera harrapatu arte.
Ahalegin horren ostean, berak eta Danel Gorostiagak lortu zuten beste ihesaldi batean eta azkenean hirugarren sartu zen helmugan Uriarte. Horrez gain, taldekako diziplinan irabazi zuten Aialako kirolariek.
Aiarako taldea menperatzen ari da denboraldia eta bere arduradunek goratu dute kadeteen jarrera: "Udako probetan txirrindulari gutxi ditugu, asko oporretan daudelako senideekin, baina lehiatzen diren bakoitzean oso ondo egiten dute".
Esaterako, uztailaren amaieran Iker Colmenero garaile izan zen Santa Ana de Puente Arca Sarian, eta Ion Egia Berangon. Gopegin, Colmenero izan zen irabazle eta Egia hirugarren.
Gauzak horrela, txirrindulariek ez dute etengo jarduna eta asteazkenean Asturiasera joko dute, Candamora, hain zuzen.