Eusko Jaurlaritzak alerta laranja aktibatuko du bihar, tenperatura oso altuak aurreikusi baititu

Erredakzioa 2023ko abu. 8a, 06:45

Jarduera fisikoa mugatzea gomendatu du Eusko Jaurlaritzak./ Fontso Larrazabal

12:00etatik 21:00etara alerta laranja indarrean egongo da muturreko tenperatura altuengatik, tenperaturak 40 º-ra irits baitaitezke.

Eusko Jaurlaritzak aurreratu du bihar eguerditik aurrera alerta laranja piztuko duela. Izan ere, intsolazio handiak eta goi-presioek eragindako beroari, Afrikatik iritsiko den aire oso beroa batuko zaio, eta horrek, hego-haizeak eraginda, tenperaturak asko igotzea ekarriko du. Ondorioz, 39º-ko tenperaturak espero dituzte.

Gauean iraungo du beroak

Jaurlaritzak azaldu du gauean tenperatura altuak mantenduko direla hego-haizearen eraginez, eta ez direla 26-27 º-tik jaitsiko isurialde kantauriarrean eta 30 º-tik Arabako gainerako lurraldean.

Gomendioak

Edozein larrialdiren aurrean 112 telefono zenbakia baliatzeko deia zabaldu ez ezik, Eusko Jaurlaritzak honako aholku sorta zabaldu du herritarrek aintzat har ditzaten:

  • Ongi hidratatu zaitez! Sarri edan ura eta likidoak
  • Janari arinak jan: entsaladak, gazpatxoa, barazkiak eta frutak.
  • Arropa lasaia, arina eta arnasa hartzen uzten duena erabili.
  • Saiatu kalera ez irteten eta jarduera fisikoa ez egiten bero handiena egiten duen orduetan.
  • Irteten bazara, burua estali eta itzaletik ibili.
  • Etxea fresko eduki, eta pertsianak jaitsi eta leihoak itxi bero handieneko orduetan.
  • Bero handia sentitzen baduzu, freskatu gorputza, aurpegia eta eskuak ur freskoarekin.
  • Botikak toki freskoan gorde.
  • Arreta berezia eskaini haur txikiei, adingabeei, adinekoei, haurdun dauden eta bularra ematen ari diren emakumeei eta gaixotasun kronikoak dituzten pertsonei.
  • Bisita itzazu zure inguruko adineko pertsonak, bereziki bakarrik bizi badira.
  • Inoiz ez utzi pertsona bat edo animalia bat aparkatuta eta itxita dagoen ibilgailu baten barruan, itzalean egonda ere.
  • Ordubetean baino gehiagoan luzatzen diren eta beroarekin zerikusia duten sintomak sentituz gero, osasun-laguntza eskatu eta leku fresko batean egon.
  • Norbaitek konortea galdu badu eta botaka egiten badu, burua albo batera begira jarri eta arnasa hartzeko bideak libre utzi.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide