Bihar 17:00etan hitzordu garrantzitsua izango du Aiarako Kuadrillak. Behin Laudioko, Amurrioko, Aiarako, Artziniegako eta Okondoko udal gobernuak egonkortu direla, erakundeko 29 ordezkariek ekingo diote presidente berria hautatzeko bozketari. Zaraobeko gainean presidenteordea nor izango den ere erabakiko dute.
Hori dela eta, egungo presidentea Encina Castresana Astarloak agurtzeko oharra zabaldu du. “Lehendakari izendatu nindutenean, erakunde-mailan esperientzia eskasa nuela aitortu nuen eta, geroztik, indar politikoen arteko elkarrizketaren alde lan egin dut. Gainera, beti izan dut nire taldearen babesa eta konpromisoa, eta aurrerapen handiak egin ditugu bultzatzea eskatzen zuten esparru eta arloetan”, aipatu du.
Bere legealdiari dagokionez, Castresanak honako proiektu hauek nabarmendu ditu: "Kuadrillaren egoitza Aiarako udalerrian kokatu izana eta lehen urratsak egitea Foru Plana eskatzeko, Aiarako Kuadrillaren egoitzako obrak hasi ahal izateko. Halaber, abian jarri den beste proiektu bat langileak egonkortzeko prozesua izan da, "2024ko abendua baino lehen amaitu beharko dena".