24 ordu bete dituzte dagoeneko Autoglas-Glavistako langileek itxialdian, baina ez dira bakarrik egon ia une batean ere ez. Dozenaka lagun animatu dira lantegiko sarrerara gerturatzera, euren lanpostuen alde borrokan ari diren beharginei babesa eta elkartasuna helerazteko.
Atzo Madres Mercedariaseko hainbat langile igo ziren fabrikara, Herriko plazatik abiatuta, eta berdina egin zuten bi ordu beranduago Aiaraldeko Mugimendu Feministako kideek, datorren azaroaren 30an egingo den greba orokor feministaren deialdia zabalduz. Eskualdeko pentsiodunak, aldiz, itxialdiaren hasieran bertaratu ziren fabrikaren sarrerara.
Eta gaur errepikatu egin da egoera. Egunsentiarekin batera abiatu dira eskualdeko udaletako hainbat langile fabrikara, eta gosaria eraman dute eurekin, itxialdian daudenei emateko.
10:00etan, aldiz, Aiaraldeko hainbat enpresetako ordezkarien txanda izan da. Tubacexeko, Maderaseko, Megatecheko, Tubos Reunidoseko, Inauxako eta Ferroko beharginak batu dira, besteak beste.
Eguerdian, aldiz, Aldai plazara eraman dute protesta, Autoglas-Glavistako langileen aldeko elkarretaratzea egin baitute bertan merkatua jartzen duten baserritarrek.
"Kedada herrikoiak"
Elkartasun keinuak ugaritu egingo direla aurreikusi daiteke. Izan ere, SOS Aiaraldea plataformak "kedada herrikoiak" antolatu ditu Herriko plazatik abiatuta.
Gaur 14:00etan, 16:00etan eta 18:00etan izango dira zitak. Bihar, aldiz, 7:30ean, 10:00etan, 14:00etan eta 16:00etan egingo dute. 18:00etan, aldiz, lantegira zuzenean bertaratzeko deia luzatu dute, bertatik abiatuko baita mobilizazio nagusia.
Argazkiak: SOS Aiaraldea