Kalean dago honezkero Aiaraldea Hemen hamabostekariaren ale berria, 187. zenbakia, alegia. Erreportaje ugari jaso ditugu agerkariaren 32 orrialdeetan. Bi dira gai nagusiak: Autoglas-Glavistako lan gatazkaren inguruko analisia eta Eusko Jaurlaritzak diseinatutako Energia Berriztagarrien Sektore Planari buruzko erreportajea.
Proiektu eoliko eta fotovoltaikoak mapa gainean
Eusko Jaurlaritzako Ekonomiaren Garapen, Jasangarritasun eta Ingurumeneko Sailak Energia Berriztagarrien Sektore Plana osatu du, lurralde antolamendua arautzeko energia berriztagarrien esparruan. Orotara 20 proiektu eoliko eta fotovoltaiko aurreikusi dituzte eskualdeko lurretan. Aiaraldea Komunikabideko kideok mapa bat osatu dugu proiektu energetiko horien kokapena azaltzeko.
Autoglas-Glavistako egoera
Egoera zailean aurkitzen dira Autoglas-Glavista enpresako 240 langileak. Enplegua Erregulatzeko Espedientea dute mahaigainean, eta egunez egun geroz eta bideraezinagoa dirudi fabrikaren etorkizuna, Guardianek lurren salerosketari ezezkoa eman ostean. Balizko konponbide baten inguruan hausnartu dugu agerkariaren azken zenbakian, hainbat iturri sindikalekin balizko irtenbide bati buruz hitz eginda: fabrikaren lurren desjabetzea.
Hauek eta beste hainbeste gai topatu daitezke Aiaraldea Hemen hamabostekariko orrietan. Astelehenetik aurrera banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.