Europar Batasunak mikroplastikoen aurkako politikak bultzatzeari ekin dio eta horrek eragin zuzena izango du herritarren bizitzetan. Printzipioz, estrategia horren berri izan zuen jende gehienak purpurinaren debekua dela medio, baina kautxuaren aurkako neurriek ere isla izango dute aurki.
Izan ere, Europar Batzordearen aburuz, mikroplastikoen iturburu nagusia kautxua da eta gai hori belar artifizialeko zelaietan baliatzen da, hare geruzaren azpian, hain zuzen.
Hori dela eta, Europar Batasunak kautxuaren ekoizpena debekatu du eta belar artifizialeko zelaiak ere aldatzeko beharra ezarriko du, zortzi urteko epean.
Zazpi zelai Aiaraldean
Aiaraldean belar artifiziala erabiltzen dute hainbat udalerrik, futbol zelaietan, gehienbat (nahiz eta erabilera anitza eman ahal zaien kirol azpiegitura horiei). Guztira, belar artifiziala zazpi zelai daude eskualdean: Urduñako Arbietokoa, Orozkoko eta Arrankudiagako futbol zelaiak, Amurrioko Refor kirolgunean dauden bi azpiegiturak eta Laudioko Ellakurikoa, Altzarratekoa eta Gardeako Hockey zelaia.
Ordea, Arabako Hockey Federazioak azaldu dionez Aiaraldea Komunikabideari, Gardeakoak ez dauka kautxurik.
Gogoratu beharra dago 600.000 euro bideratu zituela Laudioko Udalak Ellakuriko zelaira 2016an eta 2017an. Inbertsio horren asmoa zen ahalbidetzea futbol jokalarik gehiagok baliatzea kirolgunea, eta ez soilik CD Laudioko talde nagusiak.
Europar Batasunak agindutako aldaketak inbertsio gehiago ekarriko ditu, baina ikusteke dago zer nolako diru kopurua exijituko duten.