Errigora ekimenak badu zer ospatu, hamarkada bete baitu aurten: "2013an jaio zen Errigora. Iruñeko Nabarreria plazan dagoen Zabaldi Elkartasun Etxean agertu ginen urriko egun batean, egitasmoaren asmoak aurkeztu eta Nafar hegoaldeko uzta euskarari puzka kanpainan parte hartzeko deia egiteko".
Ibilbide oparo horretan 130.000tik gora saski bete dituzte Nafarroa hegoalde eta erdialdeko produktuekin, Euskal Herrian bertan kontsumi daitezen. Baina tokiko ekoizpena sustatzea ez ezik, Errigorarentzat oso garrantzitsua izan da Nafarroan bertan euskararen alde lanean ari direnei ekarpen ekonomikoa egitea: "Euskalgintzaren zakua ere oparo bete dugu -1.800.000 euro!- saskiek emandako mozkinekin".
Gauzak horrela, efemeridea ospatzeko eta sortu duten komunitatea handitzen joan dadin, Errigorak saski bakarra salduko du (beste urte batzuetan ekologikoa edota arrunta eskaintzen zuten, esaterako). Ondorioz, 23 ekoizleren 9 produktu ekologiko eta konbentzional uztartuko dituzte saski bakoitzean.
5 produktu amankomunak izango dira: zainzuriak, piperrak, orburuak, gozo bat eta alkoholdun botila bat. Beste 4 produktuak gainontzeko ohiko produktuen artean hautatuko dituzte: olioa, kardoa, babarrunak, gazta, pasta...
Hiru saski eskuratzeko aukera
Esan bezala, hamarkada emankor honetan sortutako komunitatea balioan jartzeko, Errigorak hiru saski zozkatuko ditu Aiaraldean. Zozketan parte hartzeko hemen eman behar da izena eta urriaren 31n jakinaraziko du Aiaraldea Komunikabideak nortzuk izan diren saridunak.
Edonola ere, kutxa lortzen ez dutenek eskura izango dute bat edo nahi beste erosteko aukera, azaroaren 9an baino lehen. Errigorako webgunea bisitatu dezakete horretarako.