Euskalgintzaren Kontseiluak deituta eta Oldarraldiaren aurrean euskararekin bat, euskaraz bat lemapean, manifestazioa egingo dute larunbatean -azaroak 4- Bilbon. Kontseiluak euskararen biziberritzea helburu duten neurrien kontra auzitegietatik jasotako sententziekiko desadostasuna publikoki agertzea du helburu. "Udal Legearen eta garapen dekretuaren gainean hartutako azken epaiek euskararen normalizazioaren aldeko politika publikoak egiteko jokalekua deseraiki dute", Euskalgintza Kontseiluaren hitzetan; "lehenik euskal hiztunontzako zaila zena, orain okerrago dago".
Herritar orori luzatu diote Bilbora bertaratzeko deia, eta hiru arrazoi aurkeztu dituzte mobilizazioaren beharrizanaz jabetzeko: botere judizialaren esku-hartzeak salatzea, euskararen normalizazioan aurrera egitea eta herritarren eskubideak erdigunean jartzea.
Larunbat honetan Bilboko manifestaziora joateko hiru arrazoi aurkeztu ditugu
— Euskalgintzaren Kontseilua (@kontseilua) October 31, 2023
Botere judizialaren eskuhartzeak salatzeko.
Euskararen normalizazioan aurrera egiteko.
Herritarron eskubideak erdigunean jartzeko.
Irakurri xehetasun guztiak https://t.co/wSkTxkJ7JR pic.twitter.com/9EmAvbfSbf
Aiaraldea Kooperatiba Elkartea ere oldarraldiaren aurka
Aiaraldea Kooperatiba Elkarteak atxikimendua adierazi dio Euskalgintzaren Kontseiluak larunbaterako deitutako manifestazioari. Langile eta bazkideek deialdiarekin bat egin, eta 17:30ean Jesusen Bihotzetik abiatuko den mobilizazioan parte hartzeko deia luzatu diete Aiaraldeko bizilagun guztiei. Eskualdeko herritar guztiak batera joateko asmoz, tren-kedadak ere zehaztu dituzte:
- 15:26 Urduña
- 15:32 Amurrio
- 15:38 Luiaondo
- 15:44 Laudio
- 15:46 Areta
- 15:48 Arakaldo
- 15:51 Arrankudiaga