Errigorak aurrera jarraitzen du 10. urteurreneko ospakizun eskuzabalekin. Pasa den astean hainbat saski zozkatu ostean, honetan Nafarroako upategi bat hobeto ezagutzeko hitzordu bikoitza eskuratzeko aukera emango du. Izan ere, bisita eta bazkaria eskuragarri jarriko ditu. Zehazki, Lakar udalerrian dagoen Lezaun Upategiko ateak irekiko dituzte parez pare urtarrilean eta otsailean.
Errigorakideekin hori partekatzeko, egitasmoak txartel bikoitza zozkatuko du Aiaraldea Komunikabidean eta hemen eman beharko dute izena interesdunek.
Berez, modu horretan ospatu nahi du ekimenak duela 10 urte ekin ziotela Nafarroako euskalgintza babesteari: "Euskalgintzaren zakua oparo bete dugu -1.800.000 euro!- saskiek emandako mozkinekin". Hain zuzen, 130.000tik gora saski bete dituzte Nafarroa hegoalde eta erdialdeko produktuekin, bide batez, tokiko kontsumoa sustatuta.
Saskiak eskatzeko aukera
Aurten ere, Errigorak ez du bere konpromisoa ahaztu eta Nafar hegoaldeko uzta euskarari puzka kanpainaren edizio berria abiatu du. Horretarako, saski bakarra osatu dute, 23 ekoizleren 9 produktu ekologiko eta konbentzional batuta. Saskiek prezio bateratua dute, 50 eurokoa, eta azaroaren 9ra arte eskatu daitezke.