Gernika-Palestina herri ekimenak deituta, mobilizazioak egin dituzte gaur arratsaldean Euskal Herriko ehun udalerritan. Deialdi herritarrak oihartzuna izan du Aiaraldean ere, eta dozenaka izan dira palestinarren aurka Israel egiten ari den sarraskia salatzeko kalera atera diren herritarrak.
Hain zuzen ere, hilabete bete da gaur (azaroak 7) Gazako miliziek Israelen erasoa egin eta Tel Avivek azken urteetako oldarraldirik bortitzena abiatu zuenetik Gazako zerrendaren aurka. Azken datuen arabera, 10.000 baino gehiago dira hildako palestinarrak, horien artean 4.000 haur baino gehiago. Honezkero hogeita hamar egun baino gehiagoz luzatu den setioa ezarri dio Israelek Gazako zerrendari: elikagairik, urik eta erregairik gabe geratzen ari dira bertako herritarrak eta Gaza eta Egipto arteko Rafahko pasabidetik sartzen ari den laguntza humanitarioa oso urria da herritarrek biziraun ahal izateko.
Ikastetxe eta lantokietan mobilizazioak
Plazetan bakarrik ez, Aiaraldeko ikastetxe eta lantokietan ere egin dituzte mobilizazioak gaurko egunean. Laudio Ikastolako langileek, adibidez, elkartasun argazkia atera zuten Palestinako banderak eskutan.