Kalean dago honezkero Aiaraldea Hemen hamabostekariaren ale berria, 189. zenbakia, alegia. Isabel Bovedari egindako elkarrizketa jaso dugu azalean. Izan ere, Bovedaren aita, Enrique Boveda Ortiz de Zarate, Iragiko kontzentrazio-esparruan egon zen preso 1940an, behartutako lanak egiten. Orain, bertan preso egondakoen senide talde batek Frankismo garaiko lan-esklaboaren aurkako lehenengo kereila kolektiboa aurkeztu du, gertatutakoak argitzeko asmoz.
Bestelako gai xamurragoak ere jorratu ditugu agerkariaren azken zenbakian. Horien artean, Aiaraldeko Soinu Sistema kolektiboaren hamar urteko ibilbidearen birpasa. Horretarako Xabier Berganza elkarrizketatu dugu, eta reggaea eta bozgorailuak oinarri dituen mugimenduaren nondik norakoak azaldu dizkigu.
Futbola, mendia eta askoz gehiago
Kirolari ere egin diogu tartea hamabostekarian. Alde batetik, Altzarrate futbol taldeko jokalariak elkarrizketatu ditugu. Altzarrate bigarren geratu da berriki Arabako Kopako txapelketan; eta liga irabaztea dute orain erronka nagusia.
Bestetik, Mendiko Lagunak taldeak igandean antolaturiko Gorobel Ibilaldiaren XXXVII. edizioari ere espazioa gorde diogu. Horretarako, Endika Larrazabalen irudi ikusgarriekin osatutako argazki erreportajea argitaratu dugu hamabostekarian.
Hauek eta beste hainbeste gai topatu daitezke Aiaraldea Hemen hamabostekariko orrietan. Bihartik aurrera banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.