Azaroan ere ez dira faltako Aiaraldeko herri eta auzoetako festak. Ohikoan bezala, Zolloko eta Lezamako jaiek hartuko dute protagonismoa, baina hitzordu gehiago ere egongo dira.
Azaroaren 10ean hasiko dira Lezamako jaiak. Administrazio Batzarrak hiru eguneko egitarau oparoa prestatu du. Auzokideak Lezamako txokoaren inguruan elkartuko dira, bazkari eta afari herrikoietan. Larunbata izango da egunik oparoena. Egitaraua goizetik gauera luzatuko da, eta Akerbeltz erromeriaren eta DJ Varro musika jartzailearen kontzertuak izango dira osagai nagusiak. Ohiturari jarraituz, Lezamako Mendi Martxarekin eta honen osteko poteo eta mus txapelketarekin agurtuko dituzte aurtengo jaiak.
Zolloko Jaiak
Lezaman bezala, Zollon ere azaroaren 10ean jaurtiko dute lehenengo suziria, 20:00etan. Jarraian Orkresta Elektrotunak alaituko ditu herriko basterrak. Larunbatean musika eskaintza izango da nagusi. 20:00etan hasiko dira kontzertuak eta goizeko ordu txikiak arte ez da festa geratuko. Oholtza gainera Los Gavilanes mariatxi taldea, Alarma Morea, Kristonak eta Beranduegi erromeria igoko dira.
Zollotarrek azaroaren 18ra arte luzatuko dituzte festak. Larunbat horretan herri bazkaria egingo dute bizilagun guztiak elkartzeko asmoz. Horrela agurtuko dituzte jaiak datorren urtera arte.
Ugarte Eguna
Ugarteko jaiak aspaldi igaro baziren ere, auzoko jai batzordeak herritarrak beste behin batzeko egitaraua prestatu du azaroaren 18rako. Auzokideen arteko harremanak estutzea dute helburu, eta bazkaria eta kontzertuak prestatu dituzte horretarako.
Aiaraldea Komunikabidearen agendan kontsultatu daitezke egitarau guztiak.