Bizilagunak ekimenaren edizio berri bat ospatuko dute igande honetan, azaroak 19. Zehar-Errefuxiatuekin eta Aiaraldeko zurrumurruen aurkako taldeek antolatuta, hainbat jatorritako auzokideak otorduen inguruan elkartzeko xedea du ekimenak; hainbat kulturetako jakiak elkarbanatuz, auzokideak ezagutuz eta zurrumurru xenofoboen aurka borrokatuz.
Hiru hitzordu Aiaraldean
Artziniegan, Laudion eta Amurrion ospatuko dute Bizilagunak ekimena igandean. Artziniegan Toñin Luengas frontoian batuko dira 12:00etatik aurrera. Ordu horretan postreak prestatzeko tailerra eskainiko dute te beroaren konpainian. 14:00etan bazkaria eta musika elkarbanatuko dituzte. Bazkalostean, gainera, haurrentzako jarduerak ere prestatu dituzte.
Amurrion 13:00etan jarri dute elkartzeko hitzordua. Juan Urrutia plaza izango da bizilagunen topaleku, eta bazkaldu aurretik Kirikiño Atseden Taldeak haurrentzako jolasak gidatuko ditu. Artziniegan bezala, 14:00etan bazkalduko dute, musika eta kantu artean.
Azkenik, Laudion, Faktoria izango dute topaleku. 11:30etarako egin dute bertaratzeko deia. Lehenik eta behin, elkar ezagutzeko tartea hartuko dute ekimeneko parte-hartzaileek. Bazkaltzera eseri aurretik, munduko kanta, dantza eta jolasak erakutsiko dizkiote haur zein helduek elkarri.
Amurrioko zein Artziniegako ekimenean parte hartu nahi duen orok 688 800 337 telefonoan eman behar du izena. Laudioko hitzordura batzeko, aldiz, Internet bidezko inprimakia bete beharko da.