Aiaraldea izan da asteburu honetan, bigarren aldiz, Emakume Master Cup txapelketaren geltokia. Igandean jokoan egon ziren finalerdietako txartel bi eta Leire Garaik ezustea eman zuen Olatz Arrizabalaga kanporatu eta gero. Arrizabalaga finalista izan zen aurreko denboraldian, baina horrek ez zion balio izan Garai menperatzeko. Izan ere, Garaik lasaiago ekin zion jokatzeari eta Arrizabalagak, aldiz, akats gehiago egin zituen. Azkenean, 22-14 emaitzarekin izan zen garaipena Garairentzat.
Beste kanporaketan egungo txapeldunak, Amaia Aldaik, ez zuen hutsik egin eta Leire Galeanori erraz irabazi zion (22-10).
Guztira, Orozkoko pilotalekuan jokatutako partidak honako emaitza hauekin amaitu ziren:
- Eskuz banaka pilota mistoa promesak:
Nagore Galeano 4
Marta Gómez 18
- Eskuz banaka pilota mistoa promesak:
Lide Lopez 18
Amaia Zarrabeitia 7
- Eskuz banaka pilota mistoa eliteak:
Olatz Arrizabalaga 14
Leire Garai 22
- Eskuz banaka pilota mistoa eliteak:
Amaia Aldai 22
Leire Galeano 10
Aretan ere lehia
Emakume Master Cup ez ezik, gogoratu beharra dago Aretako frontoian Herriaren Txapelketaren edizio berria dagoela jokoan. Ostiralean Hormaetxe eta Albeniz bikoteak Canabal eta Bergara izan zituen aurrean.
Partida gogorra izan zen, eta Canabal eta Berga bikote nafarrak hasieratik amaieraraino menderatu zuen. Atzelariek ondo jokatu zuten, puntu luze eta landuekin. Azkenean, Nafarroako pilotariek 22-11 menderatu zuten Hormaetxe eta Albeniz.
Euskal Federazioko lau eta erdiko elite mailan, aldiz, Karregalek 22-8 garaitu zuen Uribe.