Arabako Foru Aldundiak gaur onartu du Yárritu SA enpresari ematea 3.844.905,67 euroko obra -BEZ barne-. 12 hilabete iraungo dute lan horiek.
Berez, 2016-2026 aldirako Arabako Hornidura eta Saneamendu Plan Zuzentzailean jasotako esku hartzearen bigarren fasea da obra. Lehenengoan Askargango gaina eta Izoriako ur horniketarako azpiegitura lotzeko hodi berriak jarri ziren.
Bigarren fasean, aldiz, Izorian jarritako hodi hori Askargango gainetik iristen den sarera konektatuko da. Horrela, bildutako urak Aiarako tratamendu estazioan prozesatu ahal izango dira, eta eskualdeko beste gune batzuk hornituko dituzte, Laudio barne.
10 kilometroko ibilbidea lotu beharko du obrak eta fibrozementuko hoditeria ordezkatuko dute horretarako. Horrez gain, beste ibilbide bat sortu beharko dute, orografia dela eta. Gauzak horrela, lanek eragina izango dute A-2522 eta A-3616 errepideetan eta Altube eta Berganza ibaietan.
Esku hartzea baliatuko dute uraren bi hodi Lezamarantz eta Bergantza-Berganzagoitiko biltegira bideratzeko. Altube ibaiko hargunea eta ponpaketa estazioa berritzeko lanak ere egingo dituzte, eta trazadura bera baliatuko dute etorkizunean Baranbio hornitzeko hoditeria berria eta Berganzako banaketa sarerako konexioa egiteko.