Inprentatik ateratzear da Aiaraldea Hemen hamabostekariaren zenbaki berria, 190. alegia. Urteko azken aurreko zenbakia da honakoa, eta orotariko erreportaje eta elkarrizketak topatuko ditu irakurleak.
Euskal Herriko Mugimendu Feministak, gehiengo sindikalarekin batera deituriko Greba Feminista Orokorra aztertu dugu sakonean agerkarian. Azaroaren 30ean eskualdeko kaleak hartzeko deia zabaldu dute, "zaintza eskubide kolektiboaren alde". Greba deialdiaren aldarrikapenak eta mobilizazioen eskualdeko hitzordu nagusiak aletu ditugu.
Gehigarri berezia
Horrez gain, gehigarri berezia dakar Aiaraldea Hemen hamabostekariaren 190. zenbakiak. Eskualdeko gazteen artean gertatu eta salatzen ari diren eraso matxisten gaia lantzen du gehigarriak. Horretarako, testigantzak, analisiak eta bestelako materiala bildu dugu, "indarkeria matxista mahaigainean jartzeko".
Hauek eta beste hainbeste gai topatu daitezke Aiaraldea Hemen hamabostekariko orrietan. Bihartik aurrera banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.