Renfeko C-3 lineako tren zerbitzu "eskasaren" egoera eraman du Senatura EH Bilduk

Aitor Aspuru Saez 2023ko abe. 4a, 16:15
Deskargatu Info Ahotsak :

Ohikoak bilakatu dira atzerapenak eta arazoak tren zerbitzuan. / Aiaraldea.eus

Bilbo eta Urduña lotzen dituen tren zerbitzuari buruzko lau galdera egin dizkio EH Bilduk Espainiako Gobernuari Senatuan.

Josu Estarrona Arabako EH Bilduren senataria eta Gorka Elejabarrieta Senatuko EH Bilduren bozeramaileak azalpenak eskatu dizkiote Espainiako Gobernuari, Renfe enpresak kudeatzen duen eta Araba eta Bizkaia lotzen dituen C3 Bilbo-Urduña trenbideak eskaintzen duen zerbitzu “eskasa” dela eta.

Zehazki, ordezkari politikoek lau galdera erregistratu dituzte:

  1. Azken 2 urteetan, zenbat zerbitzu kendu dira C3 Bilbo-Urduña trenbidean?
  2. Azken 2 urteetan, zenbatekoa da C3 Bilbo-Urduña Aldirietako trenbideko zerbitzuek duten bataz besteko atzerapena?
  3. Argitu egin da zeintzuk diren trenak atzeratu edota zerbitzuak bertan behera uzteko arrazoiak? Hala izatekotan, zeintzuk dira?
  4. Arrazoi horiek gainditzeko soluziorik planteatu al da? Hala bada, zeintzuk dira soluzio horiek?

Koalizioko ordezkariek azpimarratu dute zerbitzuan kalitatea geroz eta okerragoa dela eta aipatu dute aurtengo udan 6.230 intzidentzia egon direla.

Senatariek adierazi dute sindikatuek salatu dutela atzean dagoen arazo nagusia langile falta dela.

Halaber, Estarronak eta Elejabarrietak goraipatu dute zerbitzuak duen garrantzia eskualdean: "Kontuan izan behar dugu C3 Bilboko Aldirietako trenbidea Airaldeko herri gehienak Bilborekin lotzen dituen garraioa dela: Urduña, Amurrio, Aiara (Luiaondo), Laudio, Arakaldo eta Arrankudiaga; eta beraz, ezinbesteko garrantzia du eskualdeko biztanleen eguneroko bizitzan".

Jendartea

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide