ESK sindikatuko kide bat harremanetan jarri da Aiaraldea Komunikabidearekin salatzeko gaur hamabi orduz zainketa intentsiboen unitateko anbulantziak ez duela medikurik izango. Hortaz, tarte horretan erizain batek artatu beharko ditu kasuak.
ESK-ko kideak nabarmendu du Gernikako anbulantzia egoera berean dagoela. Hortaz, Osakidetzako helikoptero medikalizatuak (bitarteko guztiak dituenak), ohiko deiez gain, Aiaraldeko eta Lea-Artibaiko kasuak hartu beharko ditu.
Bestalde, sindikatuak iragarri du egoera hau errepikatuko dela etorkizunean, bere aburuz, medikuen lan baldintzak duinak ez direlako eta lanpostu horiek utziko dituztelako beste batzuen bila.
🚨Emergentzietako ZIU mugikorrak berriro ere medikurik gabe:
— ELA Osakidetza (@ELAOsakidetza) January 23, 2024
Gernika, Laudio, Langraiz…
😡Egoera normalizatzen ari da #Osakidetza langileen eta gizartearen kaltetan.
Noiz hartuko ditu @osakidetzaEJGV neurriak egoerari buelta emateko? pic.twitter.com/BqStUrKLMV
LAB sindikatuak ere mediku falta salatu du eta egungo gabeziaren testuingurua azaldu du: "Anbulantzietako zerbitzuan ez dago langile nahikorik, eta hori konpontzeko aparteko ordu mordoa egin behar dituzte, Osakidetzak ez baitu inor kontratatzen. Aste honetan beharginen artean aparteko orduak ez egiteko deia zabaldu dute eta horregatik azaleratzen ari dira mediku faltak, Aiaraldean, Gernikan edota Langraitzen".