Kalean da Aiaraldea Hemen hamabostekariaren urteko lehenengo zenbakia. Sakonean landu dugu osasun sistema publikoaren kudeaketa eta gaur egungo egoera. Izan ere, mediku baten arreta jaso gabe Laudioko anbulatorioan zendu zen David Hernandezen kasuan alarma guztiak piztu ditu eskualdean.
Gaia lantzeko Osakidetzako profesionalekin batu gara, eta guztiak bat datoz ideia berdinean: Hernandezen heriotzak azken urteetako arazo estrukturala jarri du iritzi publikoaren ahotan. Hain zuzen ere, 42 urteko laudioarraren heriotza ez da kasu isolatu bat: Camila Lopes eta Unai Ordoñez elkarrizketatu ditugu hamabostekarian, euren alaba 2020an zendu baitzen larrialdietan mediku batek artatu gabe.
Gai gehiago
Bestelako gaiak ere landu ditugu hamabostekariaren 32 orrietan. La seca eleberria argitaratu duen Txani Rodriguez idazlea elkarrizketatu dugu, obra berriaren nondik norakoak aletzeko. Tasio Martin alpinista urduñarrak Patagoniako Cerro Torre mendian bizitako abenturaren berri ere jaso dugu agerkarian.
Hezkuntza gehigarria
Aiaraldea Hemen hamabostekariak 12 orriko gehigarri berezia dakar oraingoan. Ikastetxeak Haur Hezkuntzako, Lehen Hezkuntzako eta Derrigorrezko Bigarren Hezkuntzako aurrematrikulazioan daude murgilduta. Gauzak hala, eskualdeko hezkuntza eskaintza jaso du Aiaraldea Komunikabideak gehigarrian, baita hezkuntza komunitatearekin lotutako zenbait eduki interesgarri ere.
Hauek eta beste hainbeste gai aurkituko ditu irakurleak Aiaraldea Hemen hamabostekariko orrietan. Datozen egunetan banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.