Kalean da Aiaraldea Hemen hamabostekariaren urteko bigarren zenbakia, 193.a alegia. Tokiko aktualitateari lotutako 32 orri ditu argitalpenak; albistez, elkarrizketaz, erreportajez eta argazki galeriez osaturik.
Aiara Dantza Taldearen berrogei urteko ibilbideari eskaini diogu azala. Amurrioko dantzariek 1984an ekin zioten talde horretan antolatzeari, eta geroztik belaunaldiz belaunaldi bizirik mantendu dute euskal folklorearen tradizioa eta dantzarekiko maitasuna.
Takomanoko espeleologoek Gorobeleko kobazuloetan egindako ikerketei ere tarte zabala eskaini diegu hamabostekarian. Talde horretako kideek hamarkada bat daramate mendilerroko karsta ikertzen.Aurkikuntza garrantzitsuak sinatu dituzte espeleologiaren arloan, bereziki Ponatako Pagadiko kobazulo-sisteman. Berriki koska bat gora egin dute ikerketa espeleologikoen garapenean, espeleo-urpekaritzaren mundura jauzi eginez.
Hauek eta beste hainbeste gai aurkituko ditu irakurleak Aiaraldea Hemen hamabostekariko orrietan. Datozen egunetan banatuko da paperezko euskarria eskualdeko saltoki, taberna, ikastetxe, kulturgune, liburutegi eta kaleetan, doan.