Artziniega, Aiara eta Amurrio zeharkatu dituzte gaur arratsaldean dozenaka traktorek, azken egunetan lehen sektorean egondako mobilizazioekin bat eginez.
Espainiako banderak soinean, Quincoces de Yuso eta Merindadeetako nekazariek sustatu dute gaur arratsaldeko ekimena, baina egon dira karabanara batu diren tokiko baserritarrak ere.
Lehen sektorea borrokan
Azken asteetan Frantziako eta Espainiako estatuak astindu dituzte lehen sektorearen protestek. Europar Batasunak ezarritako neurrien aurka eta sektorearen etorkizunaren alde, traktore karabanak eta errepide mozketak izan dira tokian toki.
Euskal Herrian ere izan dute oihartzuna protestek, Nafarroan gehien bat. Araban ere elkarretaratzeak egin dituzte traktoreekin, Eusko Jaurlaritzaren aurrean atzo eta Foru Aldundiaren aurrean gaur.
Espainiako Gobernuak, Eusko Jaurlaritzak zein Foru Aldundiek lehen sektoreko ordezkari sindikalekin batzartzeko prestutasuna azaldu dute, protesta olatuen ostean. Euren aldarrikapenei kasu egingo dietenaren esperoan, lehen sektoreko ordezkariek historikotzat jo dituzte mobilizazioak.