Azken asteetan Frantziako eta Espainiako estatuak astindu dituzte lehen sektorearen protestek. Europar Batasunak ezarritako neurrien aurka eta sektorearen etorkizunaren alde, traktore karabanak eta errepide mozketak izan dira tokian toki.
Euskal Herrian ere izan dute oihartzuna protestek, Nafarroan gehien bat. Araban ere elkarretaratzeak egin dituzte traktoreekin, Eusko Jaurlaritzaren edota Foru Aldundiaren aurrean esaterako.
Espainiako Gobernuak, Eusko Jaurlaritzak zein Foru Aldundiek lehen sektoreko ordezkari sindikalekin batzartzeko prestutasuna azaldu dute, protesta olatuen ostean. Euren aldarrikapenei kasu egingo dietenaren esperoan, lehen sektoreko ordezkariek historikotzat jo dituzte mobilizazioak.
Protesta olatuak Aiaraldea ere jo du, zeharka bada ere. Eskualdeko herri mugakideetatik etorriak dozenaka traktorek zeharkatu zituzten Artziniega, Aiara eta Amurrioko errepideak. Quincoces de Yuso eta Merindadeetako ekimena izan zen hura, eta Espainiako banderak eta kartel xelebreak soinean, irudi atipikoa utzi zuten gurean.
Izan ziren Burgoseko auzokideen karabanara batu zen eskualdeko baserritarrik. Baina, oro har, tokiko ekoizleek urrutitik jarraitu dituzte azken asteetan albistegietako lerroburuak okupatu dituzten protesta hauek. Izan ere, lehen sektorearen eredu industrializatu bat defendatzen duten lur-jabe handiek bultzatu dute azken asteetako nekazal-oldarraldia. Aiaraldeko baserritarren antipodetan dagoen eredua hain zuzen ere; tokikoa eta ekologikoa.
Biziraupena aldarri
Baliteke pestiziden erabilerarekin ados ez egotea, edota merkatalgune handietan baino azoka txikietan produktuak saltzea hobestea, baina izan Aiaraldeko baserritar edota Gaztelako lur-jabe handi, denak datoz bat lehen sektorea egoera ahulean aurkitzen dela ondorioztatzean: zaharkituta dagoen sektorean gehiegizko burokrazia eta honi lotutako teknologia berrien erabilerak jasangaitza bilakatu du baserritar askoren egunerokoa; lehengaien eta produkzio gastuen gorakadak ere asko murriztu du sektoreak berezkoa zuen errentagarritasun eskasa; eta, azkenik, belaunaldi aldaketa ezak baserri askoren desagerpena suposatuko du.
Aiaraldea Komunikabideko kideak Laudio eta Amurrioko azoketara bertaratu gara, baserritarrekin hitz egin eta sektoreak bizi duen unearen inguruan hausnartzeko asmoz. Kanal berezia atondu dugu horretarako, hemen irakurri daiteke elkarrizketa seriea.
