14 eta 16 urte bitarteko kadete mailako txirrindulariak Aiaraldeko errepideen jabe egingo dira martxoan. Aiarako Bira lasterketa entzutetsuak XXXIV. edizioa izango du martxoaren 9tik aurrera.
Guztira sei jardunaldik osatuko dute kirol proba, eta Aiaraldeko sei udalerri bisitatuko ditu, horien artean Orozko, aurtengo edizioko berritasun nagusia.
Euskal Herriko eta Espainiako Estatuko 35 txirrindularitza talde batuko dira eskualdeko errepideetan, berrehun parte hartzaile baino gehiago. Luyando-Ganzedo taldeak egingo ditu anfitrioi lanak. Badira ere urrutitik etorriko diren taldeak, Kanariar Uharteetatik, esatetako.
Ibilbidea eta egutegia
Martxoaren 9tik martxoaren 24ra, hiru asteburuz jarraian luzatuko da lasterketa. Sei jardunaldiz osatutako lasterketak 257 kilometroko luzera izango du.
Lehenengo jardunaldia Okondon jokatuko dute, eta azkena Amurrion. Aurtengo berritasun nagusia, ordea, martxoaren 17ko etapan dago. Izan ere, lasterketaren historian lehendabizikoz udalerri bizkaitar batetik abiatuko da; Orozkotik hain zuzen ere.
Hauek dira Aiarako Bira osatuko duten sei jardunaldiak:
- Martxoak 9: Okondo-Okondo
- Martxoak 10: Laudio-Laudio
- Martxoak 16 Arespalditza-Arespalditza (norbanakoen erlojupekoa)
- Martxoak 17: Orozko-Menagarai
- Martxoak 23: Artziniega-Artziniega
- Martxoak 24: Amurrio-Amurrio
1990ean jokatu zuten lasterketaren lehenengo edizioa, eta, geroztik, kadete mailako erreferentziazko lasterketa bilakatu da Espainiako Estatuan. Martxoaren 8an egingo dute aurtengo edizioaren aurkezpen ofiziala, eta ibilbidearen xehetasun guztiak aletuko dituzte.
Hemen ikus daiteke iazko edizioko laburpen bideoa: