Errigora ekimenak udaberriko kanpaina abiatu zuen otsailaren amaieran eta martxoaren 13an amaituko du. Nafarroako Ager zonaldeko uzta ekologikoak eta arruntak utzitako produktuak saltzen dituzte egitasmo horren bidez: tomate frijitua, pasta, kontserbak (orburuak, zainzuriak, kardua, piperrak, menestra...), ardoa, olioa...
Jende askok baliatzen du aukera urte osorako erosketak egiteko eta erabaki horrekin Errigorak sustatzen dituen balioak bultzatzeko. Izan ere, egitasmoak Nafarroako euskalgintza eragileen eta tokiko ekoizleen jarduerak babesten ditu, kalitate handiko produktuak eskaintzeaz gain.
Izan ere, Errigorak berak gogoratu duenez, lehen sektoreko etorkizuna kolokan dago: Ager eremuko esplotazioen %36 desagertu dira azken 12 urtetan eta Nafarroan nekazarien %7 baino ez ditu 40 urte baino gutxiago.
Errigorak lortu du Nafarroako olioaren %5,7 banatzera heltzea
Egoera horren aurrean, Errigorako kideek udaberriro elkartzen dute 10.000tik gora kontsumitzaileen giharra. Euskalgintza eta ekoizpen mundua elkarlotzen dituzte (ekoizle guztiek euskara plan bat dute abian 2023tik), bertako ekonomia sustatzeko gaitasuna pizten dute eta, horri esker, ekoizpen agroekologikoa bultzatzeko egindako apustuaren emaitzak bistakoak dira (pikillo piper ekologikoaren landaketa berriak sortu dira, adibidez).
Ahalegin horiekin, Nafarroako oliba-olio ekoizpenaren %5,7 banatzera heldu da Errigora eta Euskal herriko 20 jantoki kolektibo hornitzen dituzte olio, arroz edota dilistekin.
Egitasmo kolektibo eta komunitario berriak sustatu nahi ditu Errigorak: lurren erosketa, eremu komunalekin hitzarmenak...
Eta hori ez da guztia, etorkizunean lortu nahi baitute nekazarientzako lan baldintza duinagoak eskuratzea, merkatu logikatik ateratzeko ekoizle eta kontsumitzaileen arteko epe-erdiko akordioak bultzatzea edota kontsumo-elkarte eta eragileekin aliantza-sareak sortzea eta lurrak erostea, lur komunaletan hitzarmenak lortzea, ontziratze azpiegiturak bereganatzea, olio errota komunitarioak sustatzea...
Horretarako ezinbestekoa da udaberriko kanpainako produktuen salmentarekin bat egitea. Dastatzeko aukera izateko, Aiaraldea Komunikabideak bi sorta zozkatuko ditu martxoaren 13an, hau da, kanpaina amaituko den egunean.
Hemen parte hartu daitezke zozketan.