Pasa den astean argitaratu zuen Hazi Fundazioak abiatutako hiru lehiaketen emaitzak. Egitasmoak Aiaraldea suspertzeko plan bereziaren barruan kokatuta daude eta lehen sektorean eta landa eremuan ekonomia jarduera sustatzea dute helburu.
Guztira, 1.060.000 euro esleitu ditu Eusko Jaurlaritzari lotutako erakundeak, hiru ataletan banatuta. Lehenengora diru kopuru gehiena bideratu dute eta eskualdeko lehen sektorea eta elikagaien industria berritzea izan da helburua. Esparru honetan babesa jaso duten egitasmo gehienek euren aurrekontuen %50 eta %60 bitarteko dirulaguntzak jaso dituzte. Berez, 27 proiektu aurkeztu zituzten eta hamaikak ez dute dirurik eskuratu. Horietako zazpi finantzazioa agortu delako eta beste biak ez dutelako gutxieneko puntuazioa lortu. Horrez gain, batek ez zuen tarterik deialdian eta beste bat epez kanpo aurkeztu zuten.
Ikus daitekeen moduan, ideia anitzak hartu dituzte aintzat: Belardi haragi eraldaketarako zentroa, txakolindegien berritze prozesuak, ongarriak eskuratzeko azpiegiturak edota interpretazio zentroak, besteak beste.
Landa eremuko jarduera ekonomikoa bultzatzeko bi deialdi
Aurrekontu txikiagoarekin izan bada ere, beste bi deialdi egin zituen Hazik Aiaraldeko landa eremuan jarduera ekonomikoa mantendu eta bultzatzeko.
Lehen deialdian hamabi proiektuk parte hartu zuten. Horien artean bost hautatu zituzten eta %40ko dirulaguntza jaso zuten. Beste bat %22arekin geratu zen, dirua agortu zelako. Beste lau finantzazio gabe geratu ziren, batek ez zuen gutxieneko puntuazioa eskuratu eta azkenengoa ez zen sartu deialdiaren planteamenduaren barruan.
Honako hauek izan dira esleitutako egitasmoak:
Azkenik, bost proiektuk parte hartu zuten landa eremuko ekintza ekonomikoa sustatzeko beste deialdian eta horietako lauk %70ko finantzazioa izan dute. Besteak ez zuen bat egiten eskatutakoarekin. Egitasmo hauek modu zuzenean daude lotuta agroekologiarekin eta tokiko ekoizle txikiekin: