Kalean da Aiaraldea Hemen hamabostekari berria, 194. zenbakia, alegia. Arkaitz Eskuza eta Iker Larrazabal pilotari profesionalei eskaini diegu tokia azalean. Orozkoko partiden ondoren, ostiral honetan aurrez aurre arituko dira Zumarragan jokatuko den finalaurreko partidan.
Bi pilotariek Binakako Serie B Txapelketako finalerako txartela dute helburu, eta partidaren aurreikuspenen inguruan galdetu diegu.
Beste hainbat gai jorratu ditugu agerkarian: Zinkha taldeari elkarrizketa, Okondoko Altxa Burua egitasmoari buruzko edukia edota herriz herrikako aktualitatea.
Emakume Langilearen Nazioarteko Eguna
Martxoaren 8ak aldarrikapenez beteko ditu Aiaraldeko kale eta plazak. Hamabostekarian espazio zabala eskaini diogu Emakume Langilearen Nazioarteko Egunari, eta honen testuinguruan antolatu diren hainbat eragilerengana hurbildu gara: Amurrioko Emakumeon* Sarea, Aiaraldeko Gazte Talde Feminista eta Arrankudiaga eta Zolloko Emakume Taldea.
Horrez gain, datozen egunetako mobilizazio eta ekintzen agenda zabala osatu dugu, herriz herri eta orduz ordu.
Hauek eta beste hainbeste gai aurkituko ditu irakurleak Aiaraldea Hemen hamabostekariko orrietan. Datozen egunetan banatuko da paperezko euskarria eskualdeko saltoki, taberna, ikastetxe, kulturgune, liburutegi eta kaleetan, doan.