Aiaraldean geratu da Errigoraren udaberriko kanpainaren zati bat. Ekimenak berak Aiaraldea Komunikabideari azaldu dionez, 116 etxebizitzen despentsak beteko dituzte eskualdean ezarri diren banaketa puntuen bitartez.
Zehazki, honako hauek izan dira datuak:
| Herria | Eskatzaile kopurua | Olioa (litroak) | Kontserba, lekale, arroz, pasta eta ardo loteak |
| Laudio | 63 | 820 | 236 |
| Amurrio | 32 |
485 |
105 |
| Orozko | 3 | 65 | 13 |
| Urduña | 18 | 290 | 62 |
| Guztira | 116 | 1.660 | 416 |
Nafarroako Ager zonaldeko uzta ekologikoak eta arruntak utzitako produktuak saldu dituzte kanpaina honen bidez: tomate frijitua, pasta, kontserbak (orburuak, zainzuriak, kardua, piperrak, menestra...), ardoa, olioa... Eta emaitzak positiboki baloratu ditu Errigorak.
"Azken hilabetetan agerikoa izan da elikagaien prezioen eromena eta baita nekazal munduaren itolarria ere. Merkatu logikak eragiten dituen zailtasun hauen aurrean, bestelako merkaturatze eredu bat praktikaratzeko aukera izan da udaberriko kanpaina", adierazi dute.
Berez, egitasmoak Nafarroako euskalgintza eragileen eta tokiko ekoizleen jarduerak babesten ditu, kalitate handiko produktuak eskaintzeaz gain. Egindako lanari esker, hurrengo datuak lortu dituzte:
- 10.000 etxetako eskariak.
- 127.000 litro olio salmenta.
- 26.000 kontserba, lekale, arroz, pasta eta ardo lote saltzea
Kanpainaren hasierarekin batera, Aiaraldea Komunikabideak Errigorako bi lote zozkatu zituen eta irabazleak Maider Molina eta Janire del Campo izan dira.