Astebete falta da Eusko Legebiltzarrerako hauteskundeak izateko, eta Aiaraldea Komunikabideak ere jarraipen berezia egingo du horri begira. Hauteskunde debatea antolatuko du komunikabideak bihar (astelehena, apirilak 15) Faktorian, 19:00etan.
Eskualdean ordezkaritza duten eta hauteskunde hauetara aurkezten diren talde politiko guztiei luzatu zaie eztabaidan parte hartzeko gonbita, bi baldintzarekin: debatea euskara hutsez izatea eta eskualdeko ordezkariek parte hartzea.
Gauzak hala, hiru alderdi animatu dira biharko zitan parte hartzera: Ander Añibarro Maestre bertaratuko da EAJ-PNVren izenean, Eba Blanco de Angulo EH Bilduren izenean eta Juan Carlos Ruiz Diez, PPren izenean.
Eskualdean zeresana izan duten gaiak izango dituzte hizpide solasaldian.
Eskualdeko gaiak ardatz
Hauteskundeak EAE mailakoak diren arren, biharko debatean protagonismo berezia emango zaie Aiaraldean modu batean edo bestean zeresana izan duten gaiei. Gauzak hala, Osakidetzaren egoera, industria politika, euskara eta trantsizio energetikoa izango dituzte ardatz EAJ-PNVk, EH Bilduk eta PPk. Ondoren, azken bloke batera pasako dira, zeinean bakoitzak aukera izango duen tintontzian geratu diren bestelako gaien inguruan hitz egiteko.
Zuzenean zein presentzialki jarraitzeko aukera
Debatea aurrez aurre ikusteko aukera egongo da, Faktoriara bertaratuta. Hala ere, Aiaraldea Komunikabideak zuzenean emitituko du saioa, Aiaraldea.eus atarian eta Youtube, Twitch eta Instagram bidez.