Berriro mobilizatu dira gaur Amurrioko Udaleko langileak, iragan ostiralean abiatutako ekimenari jarraiki. 15 minutuko elkarretaratzea egin dute udaletxearen sarreran, enpresa batzordearekin negoziatzea exijitzeko Gobernu Taldeari.
Prentsa oharrean azaldu dutenez, sindikatuak berriz saiatu dira negoziazio-mahaia abiatzeko data zehazten, “akordio batera iristeko eta mobilizazioak bertan behera uzteko”. Baina, "erantzun ofizialik" jaso ez dutenez, gaurko protesta mantentzea erabaki dute azkenean.
“Manipulazio-maniobrak”
Are gehiago, “manipulazio-maniobrak” egon direla salatu dute langileen ordezkariek. Euren hitzetan, elkarretaratzea baino hiru ordu lehenago komunikazio pertsonalak bidali dizkie alkateak langileei. “Hori guztia enpresa batzordeari ezer jakinarazi gabe, eta negoziazio-mahaia hasteko eguna eta ordua zehaztu gabe”, nabarmendu dute.
Horrez gain, negoziazioetan enpresa batzordeko kideen parte hartzea baldintzatzea leporatu diote gobernuburuari, hori “guztiz legez kanpokoa” dela nabarmenduta.