Eusko Jaurlaritzak publiko egin ditu 13:00ak arteko parte hartze datuak. Aiaraldeko udalerri guztietan nahiko parekoa izan da parte-hartzea, eta biztanleen %29,13ak eman du honezkero botoa. Euskal Autonomia Erkidegoan joera berdina izan du parte hartzeak. Herritarren %28ak baliatu du botoa emateko eskubidea Araban, Bizkaian eta Gipuzkoan.
Aurtengo parte hartze datuak, ordea, ez dira 2020ko hauteskundeekin alderagarriak. Izan ere, orduko hartan eskainitako lehenengo aurrerapena 12:00etako boto kopuruarena izan zen; %14,14koa EAE mailan. Kontuan hartu behar da ere duela lau urte posta-bidezko boto kopurua oso altua izan zela, pandemiaren eraginez.
Hemen kontsultatu daitezke datuak herriz herri:
Eskualdeko hautagaiak
Guztira 19 aiaraldear daude Eusko Legebiltzarreko Arabako eta Bizkaiko hauteskunde zerrendetan: EAJko zerrendetan bost, EH Bilduko zerrendetan sei, PSE-EEkoetan lau, Elkarrekin Podemos-Alianza Verdekoan bi eta bana PPkoan eta Sumarrekoan.
EAJko Arabako zerrendan hirugarren doan Ander Añibarrok Latiorroko hauteslekuan eman du botoa goizean. EH Bilduko zerrenda arabarreko bigarren postua okupatzen duen Eba Blancok, aldiz, Amurrioko pilotalekuan sartu du botoa. Zenbaketan jakingo da 19 aiaraldearretatik zenbatek lortuko duten eserlekua eratzear den Eusko Legebiltzar berrian.
