Inprentatik atera berri da Aiaraldea Hemen hamabostekariaren azken zenbakia, 198. alegia, gai eta elkarrizketa ugari jorratu ditu agerkariak 32 orrialdeetan.
Bambi amurrioar gazteari egindako elkarrizketa ekarri dugu azalera. Kirurgia finantzatzeko diru bilketa abiatu berri du Bambik, eta testuinguru horretan bere trantsizio prozesuaz zein bere ibilbide artistikoaz hitz egiteko parada izan dugu. Trans kolektiboaren egoeraren inguruan ere luze hausnartu du amurrioarrak gurean.
Amurrioar gehiago elkarrizketatu ditugu ere, horien artean Ane Ramos Izaga patinatzaile gaztea. Hamaika urterekin harridura sortu du Espainiako Vert Txapelketan. Kirol diziplina horren inguruan mintzatu da gurekin.
Aiaraldea Jaietan
Udaberriarekin batera iritsi dira eskualdeko zenbait herritako jaiak, eta horien inguruko informazioa eta egitarau guztiak jaso ditugu hamabostekariarekin batera kaleratu dugun 12 orriko gehigarri berezian. Hain zuzen ere, Aiarako San Prudentzio jaien, Amurrioko San Jose auzoko jaien, Gardeako jaien eta Otxomaioen programazioa jaso dugu, bai eta festetako protagonisten adierazpenak ere.
Hauek eta beste hainbeste gai aurkituko ditu irakurleak Aiaraldea Hemen hamabostekariko orrietan. Datozen egunetan banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.