Jaietako hizkuntza paisaian eragiteko ekimen bateratua aurkeztu dute Laudio, Urduña, Artziniega, Orozko, Aiara eta Arrankudiaga-Zollo Udalek: 'Gora Aiaraldeko jai euskaldunak!'. Jai-giroko esparru guztietan eragin eta euskara bultzatzeko asmoa du ekimenak, eta eskualdeko alkate, zinegotzi eta euskara teknikarien ordezkaritza zabal batek babestu du berau gaur goizean Arespalditzan egindako aurkezpenean.
Matxalen Garcia-Escudero Urduñako euskara teknikariak azaldutakoaren arabera, Urduñan azken urteetan garatutako esperientzia positiboan oinarritu dira, dinamika berria martxan jartzeko: "Ekimenarekin bat egin dugun Aiaraldeko 6 udalek gure herrietako jai nagusietan neurriok ezarriko ditugu, urtez urte jai guztietara hedatzeko eta neurri sorta aberasteko asmoz. Gaur bide bati hasiera ematen diogu, pausu gehiago emateko guraz, Aiaraldean euskara bultzatzea xede", adierazi du Garcia-Escuderok.
Neurri zehatzak euskara bultzatzeko
Honako neurriak barnebilduko ditu kanpainak:
- Euskara sustatzeko euskarriak sortu eta banatuko dira jai-gune eta ostalaritzan, euskararen presentzia bermatu, mezu ezberdinak zabaldu eta erabilera bultzatzeko.
- Txosnetarako hizkuntza irizpideak ezarriko dira: gutxienez musikaren %65 euskaraz, lehen hitza euskaraz, gazteekin euskarari eutsi, tabernari euskaldun bat txandako gutxienez, azalpenak megafoniatik gazteentzako euskara hutsez eta helduei elebidun gutxienez.
- Jaietako ekitaldietan hizlari elebidunak eskatu edo eta eskainiko ditu Udalak.
- Ostalariei euskara sustatzeko gomendioak helaraziko zaizkie gutun bidez, hainbat baliabide haien eskura jarriz.
- Egitaraua azaltzeko liburuxka, kartel eta web-gunetan ekitaldiak Euskararen Semaforoarekin etiketatuko dira, euskararen presentzia eta euskaldunon hizkuntza aukerak ikusgarri eginez.
Aiaraldeko Euskalgintza Kontseiluak txalotu egin du eskualdeko sei udalek garatutako ekimena: "Garrantzitsua da oso emandako pausua, eta balioa eman nahi diogu. Berebizikoa da euskararen normalizazioa lortzeko bidean instituzioen papera. Berebizikoa da elkarlana sustatzea. Berebizikoa da neurri zehatzak eta ausartak bultzatzea. Eta gaur hemen aurkezten den ekimenak guzti horretatik asko dauka".