Azken urteen joerari jarraipena emanda, Aiaraldeko txirrindulariek podiumak hartzeari ekin diote asteburu honetan ere.
Larunbatean Ion Egia berriro irabazle eta Muñoz eta Uriarte podiumean
Larunbatean eskualdeko txirrindulariak Arronizen eta Karrantzan ibili ziren. Arronizeko hitzorduan kadeteak aritu ziren eta Ion Egiak irabazi zuen esprintean, lasterketa oso kontrolatu baten ostean.
Karrantzan, ordea, juniorrak egon ziren eta podiumaren bi postu aiaraldearrenak izan ziren. Hodei Muñoz bigarren izan zen eta Ekhi Uriarte, aldiz hirugarren.
Igandean primeran ere
Lorpenen uzta handia izan zen igandean ere. Junior kategorian, Hodei Muñozek garaipena eskuratu zuen Muskizen. Horretarako, amaierako ihesladiaren protagonista izan zen eta tropelari minutu bat baino gehiagoko aldea atera zion, 65. kilometrotik aurrera eta aurreko ihesaldia ezer ezean utzi ondoren.
Ekhi Uriartek (Alimco Campagnolo taldekidea eta eskualdeko kirolaria) ere eutsi egin zion berriro Bizkaiko Kopa Juniorreko lidergoari, laugarren postua erdietsita.
Muskizen ere, baina kadeteen kategorian, Danel Gorostiaga bigarren izan zen, baina ez zen erraza izan beraretzat postua eskuratzea. Hasteko, sekulako euritea egon zelako. Horrez gain, Gorostiaga adi ibili zen eta ihesaldian sartu zen. Gero, bi txirrindulari geratu ziren bakarrik, eta Liher Magurekin aurrera bakarrik joan arren, bakardadean ekin zion orozkoarrak 20 kilometroz, bigarren heltzeko.