Gure Esku Aiaraldeak bi egitasmo prestatu ditu ekainerako. Alde batetik, 500 urte baino gehiego dituen Larruazabalgo kutxa izango dute hizpide. Belandia, Lendoñogoiti, Lendoñobeiti eta Mendeikako Administrazio Batzarrek -Bizkaiko bakarrak- erabiltzen dute artxibo gisa duela hainbat mende eta Belandiako elizan dago.
Jose Ignacio Salazar Arechalde historialariak Larruazabalgo erakundeen historiari eta bere elementu horri buruzko hitzaldia emango du ekainaren 16an 11:00etan.
Oletako landetan ekainaren 30ean
Horrez gain, Gure Eskuk Oletako landak hartuko ditu berriro ekainaren 30ean. Jarduera Urduña, Artziniega eta Amurrioko plazetan hasiko da mendi ibilaldiekin. Abiapuntu bakoitzetik Sopeñako Bidearen bide balizatuari jarraituko dute Oletaraino.
Han ospakizunak 11:00etan hasiko dira. Goizean herri kirolak, musika, dantzak... egongo dira.
Eguerdian, Josu Etxaburuk erabakitzeko eskubideari eta Gure Eskuren hurrengo ekimenei buruzko hitzaldia emango du. Arratsaldeko ordu biak aldera herri bazkariaren txanda helduko da. Antolatzaileek aldez
aurretik jakinaraziko dute non erosi ahal izango den bazkarirako txartela. Eta bazkalondoan, erromeria. Txosna jarriko dute.