Ekimena maiatzaren 20an aurkeztu zuten Cristina González Enplegu, Merkataritza eta Turismoko foru diputatuak eta Inma Roiz eta Itziar Herrán proiektuaren sustatzaileek. Bertan azaldu zutenez, "Arabako herriak. Amamengandik bilobengana" proiektuak turismoa eta kultura zabaltzea du xede, Arabako herrien erakargarritasun historiko, natural eta gastronomiko nagusiak ezagutaraztea eta tokiko memorian sakontzea “ahots ahaztuenen” bitartez: amonak.
Inma Roizek nabarmendu duenez, proiektu honek Arabako herrien historia ahoz plazaratzea eta emakumearen historia ikusaraztea du helburu.
Horretarako, herri horretan betidanik bizi izan den amona bat elkarrizketatu dute, eta amonarekin, biloba bat egoten da beti, orainaldiarekin lotura egiten duena: “ez dugu Interneten ateratzen dena kontatu nahi, herrietako biztanleek kontatzen digutena baizik”.
Proiektua hamar koaderno-gidaz osaturik dago, Añana, Amurrio, Artziniega, Asparrena (Araia), Barrundia, Santikurutze Kanpezu, Bastida, Urizaharra, Agurain eta Gaubea udalerriei buruzko amonen eta biloben testigantzekin.
Koadernoak paperean sortu dira, eta turismo-bulegoetan eta beste interes gune batzuetan egongo dira eskuragarri. Horretaz gain, herri horietan ezagutu behar diren “ezinbestekoak” -ondare materiala eta ez-materiala-, herrietako “biodibertsitatea”, herrietako istorioak kontatzen dituzten “kronistak” eta baita koaderno-gidak Arabakoherriak.com webgunean kontsulta daitezke.
Hamar koderno-gida egin dituzte momentuz, baina katalogo hori gero eta handiagoa izango da, martxan jarraitzen baitu: “herri gehiagorekin ari gara lanean, eta ahal duguna ateratzen joango gara urtean zehar. Kontuan izan behar da prozesu motela dela”.